طيفك عد البحر
جاب الخبر
عن الاهل
قال الكل بيسأل
عليك
حتي الحجر
ال كنت تجلس
عليه تحت العمود
بين الاصحاب
في مفترق
تضئي الشموع
تسرج النور لكل زائر
حتي المكان بعد ك مسخ
حتي الشوارع
بتسأل عليك
والكهول ال كانوا
بيسألوا
وصلوا القبر
والنادي خلاص أنكسر
البوم سكن فيهو
بدون أيجار
ما في نشاط
ما في عمار
الكل جاري وراء المعيشه
يا دوب يجيب ليهو
رغيفه
يسد بيهو رمق الصغار
يكون التعب
أتمكن فيهو
يمدد في السرير
يصحا الفجر
يبدأ رحلتو
ما خلاص
الضحك اتنسي
مكانو الاسي
سكن القلب
والعرق جاري
في جبهتو
طيفك عد البحر
جاب الخبر
قال الكل
بيسأل عليك
حتي الحجر
ما خلاص الناس
اتفرقوا
الكل هموا النفس
همو القرش
يبني عماره
في ناصية الطريق
حتي لو وسط الحله
يكشف بيوت الفريق
ما همو
يا حليلك يا بلد
كنت تلم الفقير
تحمي الضعيف
الليله منو الجايب
ليك خبر
خلاص طيفك رؤّح
بدون ما يكمل المشوار
ويقول عن باقي الاسرار
أنا لطيفك في انتظار
12/9/2006 م
